ʻOku pule ʻa Sihova;
tuku ke tetetete ʻae kakai:
ʻoku ʻafio ia ʻi he vahaʻa ʻoe ongo selupi;
tuku ke ngalulu ʻa māmani.
ʻOku lahi ʻa Sihova ʻi Saione;
pea ʻoku māʻolunga lahi ia ʻi he kakai kotoa pē.
Tuku kenau fakamālō ki ho huafa lahi mo fakailifia;
he ʻoku māʻoniʻoni ia.
ʻOku ʻofa foki ʻae mālohi ʻoe tuʻi ki he fakamaau;
ʻoku ke fokotuʻumaʻu ʻae fai totonu,
ʻoku ke fai ʻae fakamaau mo e māʻoniʻoni ʻia Sēkope.
Mou fakahikihiki ʻa Sihova ko hotau ʻOtua, pea lotu ʻi hono tuʻunga vaʻe;
he ʻoku māʻoniʻoni ia.
Ko Mōsese mo ʻElone ʻi heʻene kau taulaʻeiki,
pea mo Samuela ʻiate kinautolu ʻoku ui ki hono huafa;
naʻa nau ui kia Sihova, pea ne talia ʻakinautolu.
Naʻa ne folofola kiate kinautolu ʻi he pou ʻoe ʻao:
naʻa nau tauhi ʻene ngaahi fakamoʻoni,
mo e tuʻutuʻuni naʻa ne fokotuʻu kiate kinautolu.
ʻE Sihova ko homau ʻOtua, naʻa ke talia ʻakinautolu:
ko koe ko e ʻOtua naʻa ke fakamolemolea ʻakinautolu,
neongo hoʻo totongi koeʻuhi ko ʻenau ngaahi fakakaukau.
Fakahikihiki ʻa Sihova ko hotau ʻOtua, pea lotu ʻi hono moʻunga tapu;
he ʻoku māʻoniʻoni ʻa Sihova ko hotau ʻOtua.
