Ki he Takimuʻa, ko e Saame ʻa Tevita. ʻE Sihova, fakamoʻui au mei he tangata angakovi: fakamoʻui au mei he tangata fakamālohi;
ʻAia ʻoku mahalo kovi ʻi honau loto;
ʻoku nau fakataha maʻuaipē ke tau.
Kuo nau fakamāsila honau ʻelelo ʻo hangē ko e ngata;
ʻoku ʻai ʻae kona ʻoe ngata ʻi honau lalo loungutu. Sila.
Fakahaofi au, ʻE Sihova, mei he nima ʻoe angahala;
fakamoʻui au mei he tangata fakamālohi,
ʻaia kuo ne fakakaukau ke tulaki hifo hoku vaʻe.
Kuo tau fufū ʻe he laukau ʻae tauhele kiate au, mo e ngaahi afo;
kuo nau ʻaʻau ʻae kupenga ʻi he veʻe hala;
kuo nau teuteu ʻae ngaahi hele kiate au. Sila.
Naʻaku pehē kia Sihova, “Ko koe ko hoku ʻOtua:”
ʻE Sihova, ke ke ongoʻi ʻae leʻo ʻo ʻeku ngaahi lotu tāumaʻu.
ʻE Sihova ko e ʻEiki, ko e mālohi ʻo ʻeku fakamoʻui,
kuo ke maluʻi hoku ʻulu ʻi he ʻaho ʻoe tau.
ʻE Sihova, ʻoua naʻa ke fai ki he ngaahi holi ʻae angahala:
ʻoua naʻa ke tokoni ʻene fakakaukau kovi, telia naʻa nau hiki hake ʻakinautolu. Sila.
Ka ko e ʻulu ʻokinautolu ʻoku nau kāpui au,
tuku ke ʻufiʻufi ʻaki ʻakinautolu ʻae kovi ʻo honau loungutu.
Ke tō kiate kinautolu ʻae malalaʻi afi ʻoku vela: tuku ke lī ʻakinautolu ki he afi;
ki he ngaahi luo tau mamaʻo, koeʻuhi ke ʻoua naʻa nau toetuʻu hake.
ʻOua naʻa tuku ha tangata lea kovi ke tuʻumaʻu ʻi māmani:
ʻe tuli ʻe he kovi ʻae tangata fakamālohi ke tulaki ia.
ʻOku ou ʻilo ʻe fakamaau ʻe Sihova ʻae meʻa ʻae mamahi,
mo e ʻinasi totonu ʻoe masiva.
Ko e moʻoni ʻe ʻatu ʻae fakafetaʻi ʻe he māʻoniʻoni ki ho huafa:
ʻe nofo ʻae angatonu ʻi ho ʻao.
