Ki he Takimuʻa, ko e Saame ʻa Tevita. Fanongo ki hoku leʻo, ʻE ʻOtua, ʻi heʻeku lotu: fakahaofi ʻeku moʻui mei he manavahē ki he fili.
Fakafufū au mei he filioʻi ʻae kau angahala;
mei he angatuʻu fakamaveuveu ʻoe kau fai kovi:
ʻOku nau fakamata honau ʻelelo ʻo hangē ko e heletā,
ʻonau teke ʻenau kaufana ke fanaʻi ʻenau ngaahi ngahau, ʻio, ko e ngaahi lea kona.
Koeʻuhi ke nau fana ʻi he lilo ki he haohaoa:
ʻoku nau fana fakafokifā pe kiate ia, ʻo taʻemanavahē.
ʻOku nau fetokoniʻaki ʻakinautolu ʻi he meʻa kovi:
ʻoku nau fakakaukau ke tau ʻae ngaahi tauhele ʻi he lilo;
ʻoku nau pehē, “Ko hai te ne mamata kiate kimautolu?”
ʻOku nau kumi ke ʻilo ʻae ngaahi kovi ʻoku nau faʻa ʻeke ke lahi:
ʻoku taumamaʻo ʻae mahalo mo e loto ʻokinautolu kotoa pē.
Ka ʻe fana ʻe he ʻOtua kiate kinautolu ʻaki ʻae ngahau;
te nau lavea fakafokifā pe.
Ko ia tenau ngaohi honau ʻelelo ke tō kiate kinautolu:
ʻe hola ʻakinautolu kotoa pē ʻoku mamata kiate kinautolu.
Pea ʻe manavahē ʻae tangata kotoa pē,
ʻonau fakahā ʻae ngāue ʻae ʻOtua;
he tenau fakakaukau poto ki heʻene ngāue.
ʻE fiefia ʻae māʻoniʻoni ʻi he ʻEiki,
pea falala kiate ia;
pea vikiviki ai ʻakinautolu kotoa pē ʻoku angatonu ʻi loto.
