KAKAULEKI on Ieowa kaul kap pot, jap karoj en kakauli on Ieowa!
Kakaul on Ieowa o kapina mar a; padapadak jan eu ran lel eu duen a maur!
Kajokajoi on men liki kan wau i, o on wei kan a manaman akan!
Pwe Ieowa meid lapalap o meid kapinan, o meid kalom mon kot akan karoj.
Pwe Kot en aramaj akan me mal a Ieowa kotin kapikadar lan akan.
Wau o linan mi mon jilan i, manaman o linan kin kadirela nan tanpaj a im jaraui.
Komail men liki kan, ki on Ieowa, ki on Ieowa linan o manaman.
Komail ki on Ieowa linan en mar a; komail ko don mon japwilim a pera jaraui ianaki kijakij.
Komail kaudoki on Ieowa ni omail kapwat jaraui, toun jappa karoj en majak i.
Komail kaireki on men liki kan: Ieowa ta Nanmarki! Pil jappa me teneten o jota pan mokimokid. A pan kotin kaunda kainok kan ni tiak pun.
Lan en peren kida, o jappa en popol; madau en nirnirjok o audepa!
Jap en pereperen o audepa karoj, o tuka en nan wei karoj en nijinij.
On Ieowa, ni a kotido, ni a kotido, en kadeikada jappa. A pan kotin kaunda jappa ni tiak pun, o kainok kan ni a melel.
