MAIN Kot, kom kotin kaje kit alar, o kamueit kit pajaner ni omui onion, kom kotin pur on kamait kit ala.
Kom kotin kamokitadar jap o, o kawelar i, kom kotin kamauiala waja ola kan, pwe a kin mokimokid.
Pwe kom kotiki oner japwilim omui kan katoutou parail. Kom kotiki on kit er wain men kapweipwei kit alar.
A kilel eu, me kom kotiki on irail er, me majak komui, i me irail kauadar, ap kelail kidar.
Pwe kompoke pamui kan en jaladokala; kom kotin jauaja ki pali maun ar o kotin ereki kit.
Kot kotin majanier nan japwilim a mol jaraui, i me i peren kida; i pan nek pajan Jikem o jojon jap Jukot.
Kilead o Manaje iei japwe; nai kin kaunda Epraim; a Iuda iei ai jokon;
Moap iei ai dal en dudu; i kin tiakedi Edom; Pilijta kin nijinij on ia.
Ij me pan kalua ia nan kanim teneten eu? Ij me pan ian ia lel Edom?
Kaidin komui ai Kot? Komui me kaje kit alar o jota ian at karij akan.
Kom kotin jauaja kit ni at apwal akan, pwe en aramaj ar jauaje jota katepa.
Ianaki at Kot kit pan kapwaiada dodok apwal akan. A pan kotin tiakedi at imwintiti kan.
