BOEIPA te thangthen uh. BOEIPA kah a sal rhoek loh thangthen uh. BOEIPA ming te thangthen uh.
BOEIPA ming he tahae lamkah kumhal due khaw om saeh lamtah a yoethen pai saeh.
Khocuk lamkah a khotlak duela BOEIPA ming tah thangthen pai saeh.
BOEIPA tah namtom boeih soah, a thangpomnah khaw vaan rhoek soah a pomsang pai.
Mamih kah Pathen BOEIPA bangla unim a sang la aka ngol?
Vaan neh diklai sawt hamla aka buluk tih,
tattloel te laipi lamkah aka thoh tih natva lamkah khodaeng khaw,
a pilnam kah hlangcong rhoek taengah hlangcong rhoek neh ngol sak ham a pomsang.
Caya khaw imkhui ah camoe rhoek kah a manu la kho aka sa taengah a kohoe pai saeh. BOEIPA tah thangthen uh.
